Aprelin 28-də Azərbaycanda rəsmi səfərdə olan İran İslam Respublikasının Prezidenti Məsud Pezeşkian Bibiheybət məscidini ziyarət edib.
Qonağı Qafqaz Müsəlmanları İdarəsinin sədri Şeyxülislam Allahşükür Paşazadə, Dini Qurumlarla İş üzrə Dövlət Komitəsinin sədri Ramin Məmmədov qarşılayıblar.
İran İslam Respublikasının Prezidentinə məscid-ziyarətgahın tarixi haqqında geniş məlumat verilib. Bildirilib ki, yeddinci imam Museyi-Kazımın qızı Həkimə xanım burada dəfn olunub. XIl əsrdə Şirvanşah hökmdarı Əbü-l Fəth Fərruxzadın göstərişi ilə ziyarətgahın ərazisində məscid inşa edilib.
Ateizmin təbliğ olunduğu sovetlər dövründə bu məscid-ziyarətgah da repressiyaya məruz qalıb, 1936-cı ildə ərazidə yeni yol çəkilməsi bahənəsi ilə məscid partladılıb.
Azərbaycan xalqının Ümummilli Lideri Heydər Əliyev ikinci dəfə hakimiyyətə qayıtdıqdan sonra Bibiheybət məscidinin bərpası haqqında sərıncam inzalayıb və 1998-ci il iyunun 12-də məscidin bərpadan sonrakı açılışında iştirak edib.
Azərbaycan Prezidenti İlham Əliyevin sərəncamı ilə məscid-ziyarətgahın ərazisi genişləndirilib və 2008-ci il iyulun 14-də kompleks dindarlarların ixtiyarına verilib.
İranın dövlət başçısı məscid-ziyarətgah kompleksinin fəxri qonaqlar kitabına ürək sözlərini yazıb.
