Marmara Qrupu Strateji və Sosial Araşdırmalar Vəqfinin dəvəti ilə Avrasiya İqtisadi Zirvəsində iştirak edən Qafqaz Müsəlmanları İdarəsinin sədri Allahşükür Paşazadə İstanbul Patriarxı Varfolomeylə görüşüb.
Görüş zamanı dini liderlər dinlərarası dialoq, qlobal sülh və mədəniyyətlərarası əməkdaşlıq məsələlərini müzakirə ediblər.
Şeyxülislam Allahşükür Paşazadə həzrətləri Azərbaycanda əsrlərboyu formalaşmış tolerant mühitdən bəhs edərək bildirib ki, Prezident İlham Əliyevin rəhbərliyi ilə ölkədə mədəniyyətlərarası və dinlərarası dialoq ən yüksək mərhələyə çatıb. O vurğulayıb ki, Azərbaycan bu gün dünyada dinlər və mədəniyyətlərarası dialoqun əsas mərkəzlərindən biri hesab olunur.
Patriarx Varfolomey isə Azərbaycandakı dini tolerantlığı daim yüksək qiymətləndirdiyini deyib. O, həmçinin bu ilin noyabr ayında Türkiyədə keçiriləcək BMT İqlim Dəyişikliyi Çərçivə Konvensiyasının 31-ci Tərəflər Konfransının bəşəriyyət üçün mühüm platforma olacağını qeyd edib.
Görüş zamanı qarşılıqlı maraq doğuran digər məsələlər də müzakirə olunub, sonda tərəflər bir-birinə xatirə hədiyyələri təqdim ediblər.
*Materiallardan istifadə zamanı sayta istinad vacibdir!
