Azərbaycanın dini tolerantlıq modeli bütün müsəlman dünyası üçün nümunə kimi qəbul edilə bilər.

AZƏRTAC xəbər verir ki, bunu Qafqaz Müsəlmanları İdarəsinin (QMİ) sədri şeyxülislam Allahşükür Paşazadə bildirib.

Onun sözlərinə görə, fevral ayında Bəhreyndə keçirilən islamdaxili dialoqa dair mötəbər beynəlxalq konfransda bu barədə qərar qəbul olunub. Tanınmış din xadimlərinin iştirak etdiyi həmin tədbirdə Azərbaycanın məzhəblərarası dialoq sahəsindəki təcrübəsi təqdim olunub. Konfrans iştirakçıları qərar qəbul ediblər ki, məzhəblərarası anlaşma sahəsində Azərbaycan modeli bütün dünyada təbliğ və təşviq olunmalıdır.

Şeyxülislam əlavə edib ki, tədbirin nəticələri əsasında Azərbaycan, ingilis, rus və ərəb dillərində "Qiblə əhlinə çağırış" adlı kitab nəşr olunub və bütün dünyada yayılacaq: “Kitabda qeyd edilir ki, Ümummilli Lider Heydər Əliyevin əsasını qoyduğu və Prezident İlham Əliyevin uğurla davam etdirdiyi siyasət nəticəsində Azərbaycanda bərqərar olmuş tolerantlıq, dinlərarası dialoq və məzhəblərarası anlaşma mühiti bütün dünya müsəlmanları üçün nümunə olmalıdır”.

Allahşükür Paşazadə, həmçinin ölkədə dinlər və məzhəblərarası birgəyaşayışın nadir təcrübəsinin nümayiş etdirilməsi məqsədilə dünya dini liderlərinin iştirakı ilə Azərbaycanda nüfuzlu konfransın keçirilməsinin planlaşdırıldığını diqqətə çatdırıb.