Müsəlman Ağsaqqalları Şurasının sədri, Əl-Əzhər əl-Şərifin Böyük İmamı, professor, doktor Əhməd Əl-Tayyib Azərbaycan və Ermənistan arasında sülh sazişi ilə bağlı əldə edilən razılaşmanı alqışlayaraq, sənədi Qafqaz regionunda sülh və sabitliyə nail olmaq istiqamətində tarixi bir addım kimi qiymətləndirib.

Bu barədə məlumat verən Müsəlman Ağsaqqalları Şurasının Baş katibi, Hakim Mohamed Abdelsalam tarixi sazişi, eləcə də bu prosesi sürətləndirən səmimi səyləri və hazırlıq addımlarını yüksək qiymətləndirərək qeyd edib ki, bu, hər iki tərəfin münaqişəyə son qoymaq və davamlı sülh qurmaq üçün əsl iradəsini əks etdirir.
Baş katib Şuranın sülh və barışı inkişaf etdirmək, dialoq, tolerantlıq, birgəyaşayış və insan qardaşlığı dəyərlərini təşviq etmək məqsədi daşıyan bütün təşəbbüsləri dəstəklədiyini bir daha təsdiqləyib.
Müsəlman Ağsaqqalları Şurası bütün əlaqədar beynəlxalq maraqlı tərəfləri bu sazişi dəstəkləməyə və onun tam icrasını təmin etməyə, bununla da regional və qlobal təhlükəsizliyin və sabitliyin möhkəmləndirilməsinə töhfə verməyə çağırıb. Şura, həmçinin bütün xalqları və millətləri tolerantlıq və dinc birgəyaşayış dəyərlərini qəbul etməyə, zorakılığı və nifrəti rədd etməyə, sülh, anlaşma və harmoniya üzərində qurulan daha yaxşı bir gələcək qurmaq üçün birlikdə çalışmağa çağırışını təkrarlayıb.